سنسیکس 394 پوائنٹس اور نفٹی 96 پوائنٹس کمزور

ممبئی، 20 اگست (یو این آئی) غیرملکی بازاروں سے موصول منفی اشارات کے درمیان کورونا وائرس ’کووِڈ۔19‘ کے نئے کیسز میں آئی تیزی کے سبب پہلے ہی قدرے مایوس سرمایہ کاروں نے جمعرات کو شدید فروخت کی جس کے دباؤ میں بی ایس ای کا سنسیکس 394.40 پوائنٹس کم ہو کر 38,220.39 پوائنٹس پر اور نیشنل اسٹاک ایکسچینج (این ایس ای) کا نفٹی 96.20 پوائنٹس کم ہو کر 11,312.20 پوائنٹس پر بند ہوا۔

سنسیکس میں شامل 30 میں سے محض چار کمپنیوں میں خریداری دیکھی گئی جبکہ ایچ سی ایل ٹیک کے شیئر کی قیمت مستحکم رہی۔ باقی ماندہ 25 کمپنیاں سرخ نشان میں رہیں۔ نفٹی کی 50



کمپنیوں میں سے 15 اضافے میں رہیں جبکہ 35 نقصان اور دباؤ میں رہیں۔

بازار کےماہرین کے مطابق معاشی صورتحال کی بابت امریکی فیڈرل ریزرو بینک کی جانب سے جاری مایوس کن رپورٹ کی وجہ سے پوری دنیا کے شیئر بازار میں فروخت حاوی رہی۔ ساتھ ہی گھریلو سرمایہ کاروں کو کورونا وائرس کے بڑھتے کیسز کی بھی فکر تھی۔

بڑی کمپنیوں کے برعکس درمیانی اور چھوٹی کمپنیوں میں سرمایہ کاروں نے پیسہ لگایا۔ بی ایس ای کا مڈکیپ 0.87 فیصد یعنی 128 پوائنٹس کی تیزی کے ساتھ 14,869.42 پوائنٹس پر اور اسمال کیپ 0.72 فیصد یعنی 103.39 پوائنٹس کے اضافے میں 14,421.54 پوائنٹس پر بند ہوا۔